اليوم الخميس 22 فبراير 2018 - 8:43 مساءً

  
  رئيس التحرير
  شكري رشدي



من خواطرى : كلنا غلابه .. بقلم : منى حسن

الناس زعلانه اوى من ناس بتخرج وتنبسط وتعيش حياتها,  ولما تروح تشترى حاجه من مكان سواء غالى او حتى من قفص على الارض, يإنها تفاصل او تستكتر السعر

او ان ممكن غلبان فارش بضاعته ومغالى فيها علشان يكسب قرش زياده للتعايش.. ولو

إتفاصل او إتقاله ليه مغلى سعرك يبقى الحكم انه بنى ادم ماعندوش انسانيه وماقدرش حالته

ليه تاخد الموضوع من الزاويه دى؟!  

وليه الحكم على الناس اصلاً؟  ما كل واحد حر فى حياته وفلوسه

واه فى ناس كده ..  ولكن انا احن على المسكين والمحتاج ماشى ومن نفسى, مش بالجبر بطريقه مستتره,  وان فيه طريقه لعرض السلعه ولها اصول, حتى لو غلبان

لازم كل واحد مُدرك يساعد على الـحد من طريقه الجشع والتسول واستدراك العطف, علشان كلمه ده غلبان

هو المفروض سعره يكون مظبوط,  وبضاعته كويسه, وانت لوحدك حاتسيب له زياده لتقييمك لحاله

احنا حياتنا كلها بقت مرتبطه بفكر دّخلنا فى دايره مابتساعدش, ولكن الاحساس بالذنب بيزيد    

امتى حانفرق مابين انى اساعد واحد وانى الاقى غلط واحاول اصلحه, او اساعد انى اصلحه, وارفض   

وجوده اساساً.. فيه ناس كتير بتستسهل الموضوع ده

احنا اتخلقنا طبقات بإمكانيات مختلفه,  وللاسف اختلطت فيها من ايام الجدود الثقافه بالدين, فاتزرع جواك فكر واحساس صعب نزعه او تغييره,  ده غير الثقافه من بيئه البلاد العربيه

الضغوط والزياده السكانيه مساعده ولكن ماتديش الحق للانتشار,  بحجه انه الغلبان   

والناس المحتاجه بجد, قاعده فى بيوتها!! عزيزه النفس

هجره الاقاليم انتشرت وفرشت الارصفه تحت مبدء الحوجه والمسكنه , علما بإن رجوعهم بلدهم اوفر لهم ومتألقمه مع عيشتهم فى بلادهم

الفلاح نسي فلاحته وسُمره ارضه وثمرها,  ودخل على المبانى والمدنيه

والعامل هجر مصنعه وصنعته,  ورحل للمدنيه

والصنايعى صاحب الحرفه, تملك وتكبر, واحتياجه زاد, لان المدنيه توسعت

هو مين بيزرع دلوقتى علشان اكلنا يتوفر بسعر مناسب؟

هو مين بيصنع اصلا علشان تتوفر سلعنا بسعر مناسب, او حتى نتميز بسلعه نصدرها

هو ليه مدارس الصنايع والدونبوسكو او معاهدها ماتتفاعلش, وترتقى بصنايعيه يتقنوا حرفتهم بضمير وحرفيه

ليه زمان كانت حاجاتنا بضمير وقيمتها احلى؟

هو ليه الناس بتشتكى بس, ومابتحاولش تبتدى بنفسها وتعمل حاجه بإيجابيه للنهوض بالمجتمع,  بداية بمجتمعها المصغر بدل النقد المستمر,  بإن ده عمل ودول سوي

صحيح هجره العماله والناس للبلاد العربيه اثرت علينا وفكرنا, وللاسف ثقافتنا

بس لازم يبقى فيه كفايه,  ووقفه لاسترجاع مصريتنا وهويتنا ولغتنا العاميه اللى كمان بدءت تهاجر لزمن خبر كان

كلنا لازم نتكاتف ولازم نحارب ونِقوم ونساعد على استرجاع حياتنا الطبيعيه الاصليه من ضغوط الاحساس بالذنب من غير احساس بالاستغفال والاستغلال  وعدم الامان, سواء لصحتنا او امن عيشتنا

صحوه ثقافيه فكريه مع عدم خلط الصح,  والمفروض بالعاطفه والدين

كفايه ضغوط,  وكفايه شحاته وغلبنه,  وكفايه حكم على الناس من غير اساس

وزى ما قلت, الناس المحتاجه بجد,  قاعده فى بيوتها!! عزيزه النفس

مصريه  

اضف رد

لن يتم نشر البريد الإلكتروني . الحقول المطلوبة مشار لها بـ *

*