اليوم السبت 18 نوفمبر 2017 - 4:28 صباحًا

  
  رئيس التحرير
  شكري رشدي



من خواطرى : العالم يروح في خبر كان ..بقلم : منى حسن

اليونسكو: احدى منظمات الأمم المتحدة للتربية والعلوم والثقافة ..

بلاد العالم:  كل بلد لها علومها وطريقة تربيتها وثقافتها, عاداتها وتقاليدها وموروثاتها وتعاملاتها .. كل بلد فيها حاجة مختلفة عن التانية تميزها.. البلاد في الآخر كلها بتنصب فى التربية والتعليم والمعرفه.. المنظمة دي المفروض انها ترصد وبتدرس كل الاساسيات وبتحافظ على ثقافة البلاد وممكن تساعد على تطويرها وهي لها دور مهم جداً..

هي عصب العالم فى المعرفه  والامداد للمعلومات لأن كل حاجة بتصب عندها هي بطريقة أو بأخرى لها قدره بدراسه للنهوض ثقافيا وعلميا وتربويا وليها بصمه قوية على العالم ليها يعنى ليها وقع …

ايه هى الثقافه!!

الثقافة هي سلوك انساني .. ثقافة شعب هي اللي  بتخليه مختلف عن أي شعب تاني .. بتديله عادات وقيم في لغته ومعتقداته وهي من مكونات سلوكه ..

هي فيها منطق وذكاؤه ومذاهبه الفكريه وجزء كبير من حسه وروحه الانساني فبتتبلور كلها في كلمه : فطرته .. واكيد بتصقل مع الوقت بالخبرة وهى تدخل في مجال علم الانسان أكتر, والمعرفه بتتبلور وتتنقل من مكان لمكان وممكن تتفاعل مع مجتمعات تانية وتندمج لكن ساعتها مبتبقاش ليها نفس السلوكيات ..

طبعا هي مكون من مكونات اساسية حضارة البشرية واساس من اساسيات المجتمع .. وهي فيها استمرارية مع مرور الزمن طالما فيه ناس بتحافظ عليها أو بتورثها ..

الثقافة بتصقل من البيت وترتبط بالتعليم والمؤسسات التربوية ولكن مش معنى الدارس يكون هو المثقف,  وهي أصلا ملهاش مفهوم واحد, هي ليها مفاهيم كتيرة أوي كلها فيها معلومات وخبرات وتفاعلات… ولأن كلمة مثقف بتنسب للفرد, وبعدين مجموعة افراد وبعدين مجتمع,  لأن بيدخل فيها قراءه وتفكير واحاسيس وحركة وفيها حاجات نفسية وعاطقية ومعنوية ورمزية وخلافه…

هي كيان كامل متكامل بكل فرد وبعدين بيدخل في المجتمع,  ومن هنا كل مجتمع بيكون مختلف عن التاني سواء من التأثيرات او العوامل الجغرافية والبيولوجية اومن النشأة والتربية والبيئة واخرى.. ومن هنا المعرفه تكون دورها!

أما دور التربية بيدخل فيها عوامل الأخلاق والمثالية والتوجيه والاحساس بالمسؤولية,  وبيتحط  فيها الفرد أو الشخص بأنه لازم يكون فيه عنده مسؤولية وعطاء علشان ينجح ودايما بيكون فيه الفكر بالايجابية علشان يقدر يوصل للهدف اللي هو بيعمله أو عاوزه …

أما العلوم بقى فهي الظواهر الموجودة في حياتنا الطبيعية هي الفكر هي الإبداع هي التأمل في الكون هي براهين وأدلة ومسائل وتجارب .. هي بشر واحاسيس ونفس هي ادارة وتعليم هي مواد كتيرة اوي..

كل حاجة في حياتنا محتاجة دراسة من أول البني آدم, لأرض, لزرع, لجو, لسما, لهوا, لبحر, لأرقام..  معظمها لبيئة احنا عملناها…

العلوم كتيرة وهي من مفاتيح حياتنا ومن اسباب تطور حياتنا .. فالمنظومة دي كلها بتأثرعلى حياة البشر والمجتمعات والبلاد والاجناس كلها,  ومنظومة المعرفه تبنتها منظمة اليونسكو وتعتبر ركن اساسى مهم فى العالم من ضمن اركان تانية زي الاقتصاد والسياسة والزراعه وغيره ..

ودي نقطة ارتكاز مهمة للبني ادم والشعوب بتدور حوله هذه المنظومة,  وهو فى الاساس ركن بناء,  فلما يبقى هذا الركن والارتكاز صورته تتهز بالمنظر ده او يدخل في عوالم سواء مادية او سياسية وغيرها,  يبقى فين بقى المصداقية والصح والغلط والمبادئ والمُثل والتمسك بالأصول والعادات, والا إيه الموضوع!!  الموضوع محتاج شرح!!

مشاكل السنين اللي فاتت تداخل حاجات على بعض ومنها الثقافة مع السياسة .. وهنا بقت مشكلة…

ثقافة البلاد ملهاش دعوة بالسياسة هما خطين متوازيين ممكن بيكملوا بعض لكن على خطوط متوازية ماشيين جنب بعض ملهمش دعوة ببعض,  ده هدفه حاجة وده هدفه حاجة,  ده هدفه إدارة البلاد وتنميتها وده هدفه ثقافة البلاد وازدهارها ..

مشكلة الثقافة دلوقتي انها دخلت في اسلحة الحروب تحت مسمى أجيال ده جيل خامس .. جيل رابع .. أنا مش داخلة في الاجيال دى ..

إنما أنا اللي بأتكلم فيه إن زعزعة ثقافة شعب في الوقت اللي إحنا فيه هو لغي المعرفه.. أو تحويل مسار ثقافة شعب علشان يبقى زي الماريونيت.. لعب بالعقول .. لعب بالمعرفه .. لعب بالأجيال لعب بالنشء ودي ممكن تدمر مجتمعات .. وكانت بدايتها من فترة طويلة أوي ولكن كانت مستترة وابتدت تبان .. هي خطة طويلة المدى .. فيه ناس كانت شايفاها وعارفاها ولكن مكنش في ايدها تعمل شئ وكانت بتتفرج وساكته أو كانت بتحاول تقاوم من مواقعها بطريقة إنها كانت هي بتتحارب شخصيا, المشكلة الكبيرة أوي في اللي مش فاهمين ..

دلوقتى الناس لما بتتكلم على الأبعاد السياسية اللي هي وراها كره للبلد المرشحة, والسنة دي وفي الوقت اللي إحنا بنتكلم فيه  .. فيه انتخابات لرئاسة المنظمة ما بين قطر وفرنسا ومصر ..

قطر بلد صنفت انها بلد بتمول الارهاب او أداه لبؤرة الإرهاب,  وايضا قطر من زمن مش بعيد أوي او من كام سنة فاتوا, كان من ضمن الخطة اللي كانت متخطط لها ان لازم تقوى ثقافيا .. فبدأت فعلا في انها تشيد متاحف بانواعها ومنها متحف من أكبر المتاحف,  وابتدت تتوغل ثقافيا بحيث ان يبقى لها مركز ثقافي قوي ويبقى لها تاريخ ثقافي ولو انه هو مش من عدد سنين كتيره .. لكن وزنه جامد وده طبعا كان فكر وتخطيط كويس اوى من ضمن الأفكار اللي فُعلت واللي الناس مبتخدش بالها منها,  وده كان موضع استغراب جامد جدا بالنسبه لى فى وقتها, ده غير موضوع محاوله اقامه مونديال 22 ..

والردود هى علشان دي بلد صغيرة فلازم يبقى لها وضع ولكن في نفس الوقت بأقول إشمعنى ثقافه.. المجالات التانية كتير, هما كانوا يقدروا يعملوا اى حاجة تانية .. ولان الثقافة من اسلحة مجتمع اللي بيقويوا بيه ، وكنت متوقعة ان ده حيكون سلاح حيتلعب بيه امتى ماعرفش, زي حاجات تانية كتيرة  احسست وتوقعت نتائجها قبل ان تقع في بلدنا وغيرها وحصلت فعلا .

المشكلة ان الثقافة بقت سلاح ، العلم بقى سلاح ، التربية بقت سلاح .. اسلوب حياه بقى سلاح والأخطر منه ان الناس بقت عجينه سهلة بتتشكل بسرعة ، اتلغى التفكير … فاكرين أنه ده تطوير ولكن هو تدمير .. الأخطر من كده ..إن ابتدت عادات وتقاليد وموروثات للأسف  تتهز  وتتلغي مع اضافات و اختلاط المعرفه،  ومبقاش الجيل اللي طالع عنده فكر بأصوله أو عاداته أو تقاليده أو موروثاته ولو سمعها كحكاية بيضحك .. او يهزأ .. ولغت عنده فكرة الانتماء او الولاء لأن مبقاش عنده حاجة يتمسك بيها وهو متمسك باللي هو موجود ولو جاله حاجة أحسن بيلغي اللي موجود فيه،  فبقى عايش على قشرة .. القشرة دي صحيح عنده ليها مغزى او عمق للعالم بتاعه بس, مش بالعمق الاصيل اوالروحاني واحساس كده مالهوش وصف وان البني آدم عنده نوع من الارتباط  مهواش موجود بيبقى زى رمز ولكن بيكون له اساس ذو اصاله راسخ و جامد جدا جواه …..

أنا مشفتش جد جد جدي,  ولكن فخورة بيه واتعاملت باللي أنا ورثته منه, صحيح لقيت انه فعلا مش كل الحاجات انا مقتنعه بيها لسبب .. ولان خليط الموروثات والتقاليد والعقائد والتراث وحاجات اخرى اختلطوا ببعض وتحتاج لفكر وفصل مابين العادات والموروثات والعقائد والتاريخ, وان لازم البني آدم  يكون عارف الفروق ايه, واصول المواضيع ايه أوكانوا بيفكرا وعايشين ازاي وقتها,  وفاهم وعارف ايه الصح من الغلط…

بمعنى مفهوم الصح والغلط السليم,  مش مفهوم الصح والغلط اللي موجود دلوقتي ..لان الغلط والصح دلوقتى بيقال عليه انه نسبي .. وده كلام بالنسبة لي مالوش اساس ولا مقتنعة به ولا حأقدر ادخله في قياس الفكر.

الحقوق والصح والغلط  ميختلفش عليهم اتنين,  فده بره حوار سواء فكر الشباب او الزمن ده,  لانى مدرسة قديمة!!

أنا مش حاكون موجودة كمان خمسين سنة أو يمكن بكره او يمكن بعد دقيقة واحدة او ثانية ولكن يصعب عليا اني اشوف اولادي وبلدي والبلاد التانيه تبقى عيشتهم سريعه ومافيهاش خٌلق ومبدئها التو واللحظة زي الزرار اللي بيدوسوها على الكمبيوتر واحدEnter    وواحد Delete .. يصعب عليا ان ميكونوش عندهم الاحاسيس الجميلة اللي احنا عشناها .. يصعب عليا ان ميكونش عندهم المسؤليه والابداع اللي اتحطينا فيه وفِكرنا والحلم اللي كنا دايما بنحلمه,  يصعب عليا ان انا مشفش ان يبقى عندهم هدف ازعل وافرح عشانه… يصعب عليا ان مفيش الارتباط والولاء ولا عاطفه تفرق .. يصعب عليا حاجات كتيرة هما مش حاسين بيها …. يمكن الكلام سريع من جوه مش حاقادر اشرحه اوي اواوضح اللي حاسة بيه من كتر ما أنا حزينة دلوقتي ..

إحنا رايحين في حته مش حلوة ، إحنا على قد ما كل بلد بعيده عن التانية أميال وأميال وأميال .. إحنا بقينا قريبين أوي من بعض وخيوطنا بقت في ايد واحدة, وشكلها حانبقى كلنا ماريونيت بخيوط فى خشبه واحدة ودي اتخططت كويس اوي..

لو كان فى موقف تانى هدفه غير المصلحه والسيطره كان لازم يبقى لها احترام انها فكرت بالمنظر ده,  ولكن أنا بالنسبة لي ده مش احترام دي أنانية وقوة ومهانه الفكر والبني آدم ..

البشر اتولد حر اتولد على ارض واحدة انتشروا في انحاءها..  وللأسف هو اللي عمل كده في نفسه بالنفوذ والقوة والمال والغطرسه والسلطة والجاه ولغى الانسانية والادمية .. والأغرب من كده ان المنظمة دي المفروض انها كانت تحافظ على ده … لكن هما كمان اتهزت كينونتهم باللي حاصل ده ومصداقيتهم واهدافهم .. ازاي دلوقتي ممكن يكونوا بيحافظوا على البلاد .. خساره

أنا مصدومة .. ومصدومة ان ان محدش فيهم بيحاول بإن يرجعوا مسارهم صح ومصدومة ان البلاد دي كلها بقت سهلة الانقياد بالمنظر ده وللمصالح نسيوا كيانهم واصلهم وان الماده بقت هى السايده .. على علم ان دورك يا يونسكو بيدور على ان السلام يبقى موجود والأمن يبقى موجود, وبتحافظي وتطوري التربية والتعليم والثقافة علشان هدفك الاحترام والعادات والانسان .. اما بقى موضوع بلد دخلت وبلد خرجت  بقى شغل سياسة تحت ستار الثقافة .. واهو خلاص رسيت لبلد مقرك الملئ بالمعرفه والفنون فرنسا واكيد حاتحاول ان تنقذ ما تشوه وتساعدها ماليا..

الروح الانسانية هي الفكر هي التفاعل ..هي التعامل.. هي التلقائية.. هي الحس هي الاستشعار هي الأداء .. وحصل فيها كده ليه هما عايزين يوصلوا لأيه بالظبط, استعراض القوه ,, معرفش!!

وان من احدى منظمات الأمم المتحدة للتربية والعلوم والثقافة كان ممكن العالم يروح في خبر كان .. حايـبان

مصريه

2017

اضف رد

لن يتم نشر البريد الإلكتروني . الحقول المطلوبة مشار لها بـ *

*