اليوم الإثنين 25 سبتمبر 2017 - 2:50 صباحًا

  
  رئيس التحرير
  شكري رشدي



من خواطرى : مجرد خطوط !؟ .. بقلم منى حسن

تراثنا  بيتمسح وبينتهي وبيندثر شوية شوية … كل شوية بيتمحي منه حاجة .. من فيلات وقصور لعمارات… من شوارع كلها شجر لأماكن انتظار..  محلاتنا القديمة إن ماكانش كلها إتباعت .. كل الـ لاند ماركس تقريبا اتمحت  حتى المستوى اللي موجود هبط هى بس استعمالها لتحديد وصف المكان لسه للى عاصرها ومعايشها.. مصر الجديدة بشوارعها بأماكنها كلها تقريبا مبقتش زى ما هيه زى الزمالك والمعادى…. اكتر حاجة في حياتي مش فاهماها  لغي المترو ,بلاد العالم بتحافظ على تراثها وبتحافظ على وسائل مواصلاتها .. وإحنا قلعناه من الأرض علشان نوسع شارع وحاره لعربيه .. حاجة غريبة اوي ، بالنسبة لي ده مش مفهوم .. احنا عندنا من احسن شبكات او تخطيط للترام والمترو والقطر كان, ومن زمان من ايام ما اعرفش الانجليز والا قبل كده والا من وقت الملك كان فيه مع التروماي التروللي باص ، شالوا التروللي باص وجابو الأتوبيسات .. وكان لسه التروماي وعملوا كمان المترو …

المترو ده كان حاجة جميلة اوي وكان وسيلة مواصلات في ايامنا كانت ممتعه حتى التروماى والترولى باص والسنجه اللى بتقع …..

ده غير العادات والتقاليد والسلوكيات والاحترام والمسؤليه الخ الخ.. خساره  حاجة محزنه

الايام اللي فاتت دي كانت ايام فيها قرارات لمجتمع من المجتمعات الصغيره وهو النادي .. او النوادي الاجتماعية !!

النوادي الاجتماعية المفروض إن كان فى جمعية عمومية,  والجمعية دي فيها قرارات للائحة وزارة حطاها وطالبة من كل نادي اكتمال الجمعية العمومية علشان يعملوا تصويت على اللائحة بتاعتهم … اللي هو انا في الآخر مش قادرة استوعبها :

إيه اللي يدخل لائحة اعمل عليها تصويت, واللائحة دى مجرد انها guide lines   (خطوط توضيحيه)  للنوادي لحد ما يحطوا اللائحة بتاعتهم وكمان يحددوا لها وقت وكم من عدد العضاء  .. ما كل نادي حر في انه يعمل اللائحة بتاعته فى وقته  بما انهم خلاص فهموهم روتين وطريقه يمشوا عليها ويبقوا هما يعملوا الجمعيه العموميه لو هى من ضمن الروتين لاخد راى الاعضاء…

بس وارجع تانى إنما ايه الفكره من اني بأعمل جمعية عمومية على لائحة استرشادية ، وكمان محدد عدد افراد لحضور اللائحة دي بنسبة على حسب عدد الأعضاء غالبا … وده برضه مش المفروض … لأنه المفروض بأعمل حاجة برقم واحد.. انما ما اعملش نسبة لنادي اعضاؤه اعدادهم كتيرة او صغيرة لأن دي لائحة المفروض انها مش قانون أو حتمى وهو ده اللي حيمشي عليه النادي .. دي مجرد خطوط النادي بياخدها بيعرف ازاي يعمل لائحة عن طريق اللائحة دي

هي لائحة توضيحية إزاي يعمل لائحة … بطريقة أو بأخرى أو ده الفكر اللي انا واخداه او فهمته من البرامج والاعلام والنادى وضيوف الاعلام…

اللي في اللائحة كلام ذو حدين مفيهوش حاجة واضحة دايماً فيه كلام بين السطور ، وده كالعادة من المنطلق بتاعنا أو في فكرنا ما يكونش فيه نقط واضحة تماما وعملت بلبلة وعملت ربكة للنوادي … وفيه نوادي مكنتش مهيئه لا من اعضائها ولا ادارتها  اصلا,  لأن أصل الموضوع ان مجلس الادارة بتاعتهم معملش اساسا لائحة للنادي سواء بقى اذا كان مجلس الادارة ده كان موجود او مفكك او مكنش لسه اتعمل او مأدركش ان موضوع اللايحه ده حى ومش موضوع توضيحى اكتر منه مصيرى ..والاعضاء معندهمش فكرة عن اى حاجة فبالتالي حصل ان جالهم drop  ووقعوا او دخلوا تبع الوزارة لان مافيش عدد كفايه..

ومع نادي هليوبوليس رفعوا العدد من 5000 إلى 7500  ولكن اعترض النادي لأن إحنا في اللائحة اللي عندهم هي 5000 وبعد كده قالوا حيشوفوا النسبة ايه هي علشان خاطر يراجعوا اللي دفعوا الاشتراكات أو لسه ما دفعوش ، فطلع أنه لسه عدد اللي دفع الاشتراكات ما وصلش للرقم المفروض لنسبه لـ 7500 فنزلوا العدد لخمس آلاف اللي هي طبقاً للقانون الأصلي او الرقم المفروض .

اللي اقوى من كده ان محدش عمل اى حاجة أزيد من اللي المفروض يتعمل للنادي وأعضاؤه, وان اعضاءه هما قرروا يروحوا يقولوا كلمتهم, وفعلا  الناس راحت لوحدها خايفة على ناديها خايفة انه يرجع يدخل تاني في مستوى الفكر العقيم اللي ابتدى يكون ويعم على البلد …

المفروض اننا خمس الاف عجزونا  بـ 7500  رحنا 17 الف وشويه ..  وكنا حافز للنوادي اللي جايه سموحة نجحت .. وغيرهم مش عارفة لسه والجزيرة جاي وقته…أما الصيد فلازم مجلس ادارته يعمل لايحته علشان يقدر يرد تاني ناديه للمسار بتاعه والنوادي التانية, انا مش عارفة هما عايزين يعملوا ايه ومعرفش احنا بنوصل لإيه … احنا بنرتقي والا بنزعزع  كيان احنا عايزين نرفع مستوى البلد والا بننزل السلم…

النوادي الاجتماعية دي مجتمع مصغر مجتمع فيه كل حاجة كل الألوان والأشكال, كل الأفكار  كل الفكر كل الثقافة المجتمع الصغير الكويس بيأثر على اللي مش كويس بيقومه بيفهمه ايه الصح من الغلط بيتعلم منه بيرتقى بيه وفكره وبتتغير وتتأقلم بثقافه مجتمعه الجديد. وممكن يكون فى سلبيات بس ايجابيتها اكتر… النوادي ومراكز الشباب وغيرهم دول مجتمعات صغيرة محتاجة إن الوزارة تتبناهم .. مش تتبنى النوادي .. النوادي تعرف كويس اوي لأنهم على درجة معينه من الثقافة إنما الاماكن والمراكز غير النوادي دول لازم يتبنوهم ويوجههوهم علشان خاطر يرتقوا بفكرهم وبثقافتهم لأنهم مجتمع مهم… بدل ما نعمل انشقاقات في المجتمع,  بدل ما إحنا بنقلل من مستوى المجتمع,  بدل ما نحاول اننا نبوظ كل حاجة كويسة, الفكر اللي احنا فيه ده مش فكر سوي .. الطريقة إللي إحنا ماشيين بيها دي طريقة مش حتنجحنا عمرها .. واضح تماماً ان فيه حاجة مش مظبوطة للمنظومه الفكريه والثقافيه والاجتماعيه  وكأنها موجهه لتأثر على البنية بتاعة المجتمع …

حتى النوادي علشان كانوا بيبقوا عايزين فلوس بقى خليط من زمن قديم وناس جديدة داخلوا الانديه …. الناس دي ممكن تبقى او بقى لها سنين دلوقتي,  بس النادي خلاهم اوأهل النادي خلوهم يحسوا ان ده بقى بيتهم … يخافوا عليه وينتموا لمنهجه  … النادي ده بيت عيلة اللي فاهم وعارف كده كويس اوي ولاد النادي بتوع زمان … مكنش حد ما بيعرفش حد .. كان تقريبا معظم الأهالي بتعرف بعض …. كان كل عامل في النادي بيخاف على الاعضاء وأولادهم محفوظين بالاسم …اتعلمنا حاجات كتيرة اوى وإحنا في النادي وشفنا واتعلمنا حاجات اكتر…

المنظومة اللي كانت موجودة يوم التصويت في النادي دي مكنش حد مرتبها دي كلها خرجت من قلوبهم ومن جواهم .. اللي بينضف النادي كان بيعملها بحب ، الأمن كان واقف وهو قلقان على ناديه وبيوجهه الناس بِوش  بشوش …

لأن الناس كانت مستعجلة عايزة تدخل وقلقانه، غير كل المتطوعين اللي كانوا جوه في النادي كل حد وقف وساعد .. إيه الالتزام ده … إيه الحب ده إيه الروح الحلوة دي.. نسيوا كل المشاكل اللي موجودة جوه المجتمع ده مكنش هدفهم غير انهم كلهم يقولوا كلمه واحده لناديهم,  حتى لما فرحوا فرحوا فرحة واحدة ….

النظام الالتزام الحب والاحترام والمساعده والجدعنه وحاجات كتيره منسيه ظهرت فى اليوم ده..

مش معقولة ان انتم مش قادرين تفهموا وترتقوا بالفكر وتغيروا الفكر…. أنا مش عارفة هو فيه ايه بالظبط .. هل فكر !! ولا روتين ؟ واخاف يكون  مصلحه ولآ ..

بأحس إنه زي ما يكون فروق فكر قروي وبندر × تشبيه×.. فكر مش قديم لأن الفكر القديم كويس بس فكر مافيهوش تحضر .. فكر واقف في محله حتى المصلحه فيه مش فى محلها فيها تشويه… وبعدين المواضيع إن إحنا مش فى حرب ومابنحاربش, ولواننا فى حاله حرب فعليا حرب مستتره..

المواضيع ان البني آدمين عايزة تعيش بكرامه وهوية وآدمية وموروثات عاشوا فيها عايزينها متتهزش لأن ده الأمن والاستقرار بتاعهم .. ده الكيان عايزين يعيشوا في ثقافة .. يعيشوا بثقافتهم وعاداتهم…. ليه لازم نهد ده .. ليه لازم كأن البني آدم  ماشي ” واتاخد مقص حرامية فجأه” فيحس انه هو فيه ايه!!

كل ده من المصالح .. كل ده من قصر النظر كل ده من التدمير المستتر .. اللي ماشيين زي البلدوزر من غير ما يفكروا ، وبعد كده يفكروا علشان يبنوا غلط .. المجتمع الصغير والكبير محتاج وقفة …وقفة جامدة أوي

زي اللي وقفها أعضاء نادي هليوبوليس للحفاظ على مجتمعه الصغير ..

يا جماعة حبوا البلد شوية … حبوها بقى ..

مبروك وشكر لكل من ساهم في المحافظة على النادي، وشكر للمنظمين،  وشكر للأمن ، وشكر للنضافة ،  وشكر للأعضاء .. أول مرة أشوف النادي زحمة للدرجة دي …

شكراً يا عيلة ويا اصحابى والروح الجميلة,,  ياريت نعيش ونتعامل بيها دايما ..

نادي هليوبوليس ولمصر …

انتظار حار لنادينا الجزيره

مصرية

2017

اضف رد

لن يتم نشر البريد الإلكتروني . الحقول المطلوبة مشار لها بـ *

*