اليوم الجمعة 28 يوليو 2017 - 8:54 صباحًا

  
  رئيس التحرير
  شكري رشدي



من خواطرى : غروب و تفاؤل أوى .. بقلم : منى حسن

بأتفرج على السما وقت الغروب .. كان منظر جميل أوي ايه الجمال ده, سبحان الله
دايما غروب الشمس بيكون شكل السما وخصوصا لو فيه سحاب بيبقى فيه تكوينات و الوان جميله فوق الخيال ساعات..
اللي كان غريب .. وقت الغروب, إن فجأة ناحية نص السما ابتدى يتراكم فيها سحاب اسود سريع جدا جدا .. في العادي الليل بيدخل بشويش إنما نادر السما تبقى نصين .. نص تكوينات جميله حلوه من الشمس والسحاب بسيط
والنص التاني كومة سحاب فظيعه بتزيد وبتهجم على جمال غروب الشمس وبتضيع ألاحمر في أصفر في أزرق في موف في ألوان كتيرة لسواد فظيع كانت صورة جميله او منظر حلو أوي .. ومافيش دقايق وبدأت ستورم جامدة جدا عبارة عن برق بيشق السما وبعده بشويه رعد .. رعد بفرقعه فظيعة كإن الدنيا بتتشق كلها, نور ورعد وبرق وصوت حاجة قوية جدا, والسما فوقى كأنى اقدر المسها بإدايه.. ليله كانت غريبة أوي ومعاها هوا جامد جداً ومطره ليله مزعجه طويله.. وتفاجأت لما صحيت الصبح على خبر إن الدنيا زادت, مع إن في نفس الصبح كانت الشمس طالعه والسما صافيه مفيهاش حاجة خالص .. سرحت وتخيلت .. هو قرارالزيادة ده كان مرتبط بدخول وبتكوين السحابه الفظيعه اللى مليانه رعد وبرق ومطره وهوا جامد أوي.. ودخلت لاغت الغروب الحلو أوي ده بالألوان الجامدة أوي اللي كانت موجوده في السما, والمنظر اللي كان بيحاول يدي شوية روح في الحياة الصعب أوي اللي إحنا عايشينها .. أتاري تكوين السحابه السوده اللي بسرعه أوي اوي دي كانت بتسحف على المنظر الحلو اللي كان موجود في السما وبعدين … هل هي ستورم وخلاص وحتعدي وحيتراجعوا ويرجع تاني الدنيا كويسه والأسعار حتنزل ويعملوا عليها كنترول والبني آدمين حتعرف تعيش !! ولا الستورم دي حتبقى هي دي الغروب الحلو اوي وبعد كده حتيجي ستورم بسحابه أكبر منها وأقوى منها وحيحصل غلو تاني .. إحنا عندنا أربع فصول في السنة عدى منهم تلاته .. فاضل واحد يا ترى فيه مع دخوله غلو تاني .. على اساس من الشتا اللى فات.
وبعدين مش هوما غيروا يوم 29 ده اجازة, وإلا هما عملوه أجازه علشان الناس تستحمل القرار! وإلا هو كان 30 وقالوا بالمره بفرحة الناس نخليهم مبسوطين ونقولهم كمان رشة جريئة كده اننا غلينا الأسعار … يعني حتروح وتدوب مع فرحة عيد 30 يونيو .. ولا هي الناس خلاص كمان بقت أهي زواده بزواده وآدي إحنا عايشين ..
ياواش ياواش علينا ياحكومه إحنا تعبانين أوي وإحنا ناس مصرنا الطبقة بتاعتنا دي هي اللي اكتر حتتعب واللى دلوقتى ناس مالهاش مسمى لا هي فوق متوسطة ولا متوسطة حتى ولا بقت تحت متوسطة .. حتتسمى ايه !! حنتسمى اللي مالناش اسم .. ولا حنتسمى الطبقة اللامتوسطة واللا فوق متوسطة اللي هي عايشة مطحونه وخلاص .. أو حتحاول وتعافر تعيش احسن وخلاص ..
حتعيش إزاي أصلا أنا مش عارفة ما كل حاجة غليت .. وحتى اللي كان عايش ومتعايش مش حيعرف يتعايش اساسا .. شر البليه ما يضحك
مش عارفة موضوع صعب أوي.. ياريت الواحد كان بياخد ساندويتش ويشرب كوباية شاي وإنتهينا على كده .. إنما فيه حاجات كتيرة أوي والتزامات كتيرة اكتر والجو مش مساعد والصيف داخل والتكييفات حتسحب فلوس ولا هما مش واخدين بالهم مش عارفه.. الحر صعب أوي وحايخنق الناس…مينفعش كده, ده بقى غير الاكل وموصلاته وجشع تجاره بدل تحميل على البضاعه قروش حايبقى جنيهات وغيره من ذوادات وتوابع..
والمشكله كمان من زمان لما بدؤا التقسيط وخلوا كل الناس تقدر وهما يدوبك متعيشين ونيسوا كانوا واقفين فين, فنزلوا لشغلانه واتنين والناس بتكتر والولاد بتكبر والشوارع اتملت والعربيات زادت والسما تلوثت والامراض هاجمت والتعليم عقد الدماغ والارض بتعلى ادوار مش بتتعمر الارض بالعرض لقله الخدمات والتزمت بالروتين وبعدين نزعل ونقول جاى .. واحنا مش مساعدين حتى نفسنا.
وبعدين هو صندوق النقد ده عايز منا إيه .. وإلا إحنا كترنا شويه فقالك نزنق عليهم شويه .. ولا عايزنا نقوم على بعض ولا نتقسم ولا ايه مش فاهمة..
وهو مش حايحصل كل الكلام ده, حانعيش ونتعايش برضه ما أعرفش إزاي حاناكلها بدقه .. ما تيجوا نرد القرض ده لصندوق النقد ونخلص علشان يطلعوا من نافوخنا .. انا لا بتاعه سياسه ولا اقتصاد وخايبه فى الحساب ومش عاجبنى اللى بيتعمل فينا وفى البلاد ولو كنا كلنا واحد من زمان كان اتعملنا الف حساب لكن يظهر ان القوه والمال سيطرتهم بتلغى اهم الاشياء والصراحه مايهمنيش كل ده يهمنى احنا ومصرنا مش عارفة ازاى بس نعمل أي حاجه بحيث إن إحنا نبقى جوه بلدنا بينا وبين بعض عايشين, نِصنع ونصَنع وننتج يبقى عندنا ناتج زيادة عن الموجود علشان نقدر نعيش..
إحنا بننتج إيه دلوقتي ما أعرفش إحنا بننتج إيه من كتر ما أنا مش عارفة إحنا بننتج إيه ..كان زمان بننتج حاجات كتيرة أوي دلوقتي إيه اللي بننتجه .. آه بننتج بيمبو صح .. بننتج بيمبو, بننتج قها صنع في مصر مظبوط بدايه برضه . علشان كده كل حاجه بتغلى وبعدين .. حنوصل لـ فين واللى بيخلفوا دول كفايه والجيل اللي جاي ده حيعيش ازاى أصلا .. هو إحنا ناقصين إن كل واحد بقى دلوقتي بيعيش بيفكر في نفسه, يبقى دلوقتي ده مش حايفكر في نفسه بس, ده حيفكر نفسه
لا لا لا لأ الموضوع مش بنزين ولا والموضوع جنيه ولا جنيه ونص ده الموضوع كل حاجه صعبه أوي أوي أوي ربنا يستر عليكي يا مصر,,
مش عارفه ربنا يعينكم بس.. لازم إحنا كمان نشتغل ولازم نزود انتاجنا ولازم نعمل حاجه إحنا كشعب كبني آدمين مش إن إحنا نتذمر وننتقد ونقول حنعمل إيه .. حنعمل إيه ده إحساس, ده لازم حنحسه بس إحنا لازم نفكر نعمل ايه لازم نقف على حيلنا لازم نفوق بقى .. لازم ننزل نشتغل بإيدينا و بذمه لازم نعمل حاجة .. مينفعش اننا نفضل قاعدين وخلاص ونقول يا نهاري وبعدين لازم يبقى فيه خطوة ايجابية تتعمل لازم نبتدى .. حنتنازل عن حاجات كتيره اوي مش مهم .. كل دي كماليات .. على الأقل نبتدى وبعدين نبقى نرجع حياتنا تاني .. إحنا بنضيع يا جماعه فوقوا بقى .. إنتجوا وإتعلموا النظام والنضافه يمكن يبقى لنا سعر .. من فضلكوا ما تنسوش الاحترام علشان دي حاجة مهمة أوى .. نحترم نفسنا نحترم الآخر نحترم بلدنا نحترم اللي إحنا عندنا ونقدره ومانتبطرش على حياتنا ونديلها كل عزمنا علشان ده واجبنا على بلدنا وعلى نفسنا وعلى أهلنا.. ولازم ننتج ونصنع ونزرع علشان يبقى عندنا عجلة دايرة جوه بلدنا الأول وبعدين نبقى نخرج بيها باللي حاننتجه بجودة كويسة لبره بلدنا .. ما تستخصروش صحتكوا وفكركوا وعقلكوا وقوتكوا في مصر .. أرجوكو أرجوكو أرجوكو لازم نخرج بسرعه من الأزمة اللي إحنا فيها دي… ونبطل ننتقد وبس
واحدة من الطبقة اللي مش عارفة حتى تبقى إيه تسميتها ..
مصرية .. في الآخر أنا مصرية
2017

اضف رد

لن يتم نشر البريد الإلكتروني . الحقول المطلوبة مشار لها بـ *

*