اليوم الجمعة 20 أكتوبر 2017 - 4:16 مساءً

  
  رئيس التحرير
  شكري رشدي



من خواطرى: وجوه مشكله .. بقلم : منى حسن

السما: الشمس القمر النجوم والكواكب,,, الارض: التراب الهوا الميه النار.. الموت الطلاق المرض الفراق…
حق باطل كرم بخل… خير شر كره حب… الحياه الوجود النهار والليل.
دايره ودورة حياه بنى آدم.. سنه وشهر واسبوع ويوم… ووقت ساعه ودقيقه وثانيه, ويتولد ويسافر فى فيمتو من الثانيه…
هه وبعدين!!
حياتنا دى غريبه من وقت دخولنا فيها لوقت سفرنا منها.. بندخلها بصرخه وبعد شويه ضحكه وبعد شويه كلمه وشويه شويه نمشى وبعد شويه نعرف و نتعلم ونصاحب ونتعامل ونحلم ونكبر معانا احلامنا ونكافح لتحقيقها وناخد مسؤليه افعالنا ونئاوح ونعافر ونكسب ونخسر وندخل فى حياه واتنين وناخد خبره مع سنين كتيره نعيشها تتحول لحكمه نعلمها للى محتاجها, واللى عنده يدى اللى ماعندوش, وكلها كأن بنسلمها لبعض, وان وجودنا لازمته لسبب مقاسه لابس كل واحد بالظبط… يا بخته لو عرف سبب وجوده ويتعامل بيه!!
الحياه قصيره قوى بس دسمه جدا عامله زى الاكله الحلوه زياده, لو جعان اكلت بسرعه و جالك تخمه, حاتعد شويه فى مأساة لحد ماتهضم, اما لو اكلتها بشويش ومزاج حاتبقى دابتها بإنبساط…. بس الاتنين حايخدوا وقتهم وبعدين يتنسوا, ومع وقت قصير اوى حاتتحول للحظه منسيه..
كل حاجه لها عمر ووقت.. حاتسالنى ايه الحكاية مالك؟؟
حاقول حزينه زعلانه… انا جيت الدنيا دى مايفرقش عندى لا ملك وغفير وماعرفش يعنى ايه شر وحقد ولا حسد وغيره وفرق مله ودين, وان الابيض ابيض والاسود اسود مافيش لا رمادى ولا نص نص… عرفت الصح والغلط ومسؤليه الحريه وإزاى ادافع عن الحق والاحترام يسود, والخوف فى حياتى مالوش وجود
عشت فى سلام وحب, كبرت وحبيت من احببت لا فكرت ولا حسبت, واتصدمت من فكر بشر فيه جهل وتخلف فيه انقياد فيه كسل نفس وفكر قبل بدن.. كلام اكتر من فعل, حب ذات اكتر من العطاء.. نفاق وكدب وعدم امانه, والاغرب من كل ده شكوى البشر بألـ يعنى بيعانوا زيي!! وهم نفسهم من فاعلي ماساه الحياه, والكارثه انهم مصدقين انهم ضحيه!!
وغيرهم الجهل طغى على ثقافتهم ودخلوا ولعبوا لعب بعقولهم, وحوروا وحللوا وحرموا الدين على كيفهم.. واستعملوه اداه ووجهوهم لقتل وارهاب وكلام تانى كبير وغريب عن طبيعه بشرنا.. بشرنا المسامح ابو ضحكه طيبه وكرم.. صحيح الزمن اثر فيه وغيره بس لسه قادر يصد ومتماسك بضحكته.. وده وجهه الرائع من وجوه الكتير المشكله!
و غالبا هو ده سر من حياه البشر, وجوه المشكله فى حياته فى زمن يبدو لابد فيه من وجوه, وهنا التصادم بين وجوه الابيض والاسود وجوه النص نص ووجوه تايهه تتخبط مابينهم ووجوه بايعه ومتاعيشه ووجوه مدمره فرحه واحلام ومستقبل الحياه..
عموما طبيعه البشر ايجابيتها دايمه قويه ووبتعرف تتعايش وتتاقلم وتحلى عيشتها وتنبسط ومش قلقانه ومتفائله واكيد حاتعرف تفرح وتعيش .. وزى ماقالوا فى الامثال اكيد فى وقت حانعرف نطلع من الفسيخ شربات.. والرحله لسه دايره
ويومها واسبوعا وسنينها فى دورتها ونعيش…!
كل سنه وانتوا طيبين.. وشم نسيم جميل
مصريه
2017

اضف رد

لن يتم نشر البريد الإلكتروني . الحقول المطلوبة مشار لها بـ *

*