اليوم الأربعاء 16 أغسطس 2017 - 11:48 مساءً

  
  رئيس التحرير
  شكري رشدي



من خواطرى :علاقات مستتره.. بقلم : منى حسن

اعتبرت نفسى من كوكب اخر بعد ماصدمت ودخولى بكويكب من الحياه,  او كويكب حياه انا مش عرفاه او كويكب حياه جديده عليا كويكب حياه كلها كعبله و تعاملات مزيفه  و وجوه مستتره بأقنعه ….كلها حوارات زى مابيسموها الشباب
وجوه مش حقيقيه وقصص معاملات كلها زيف مافيهاش اصاله وصدق مافيهاش صفاء ولا نقاء مافيهاش مواجهه صريحه او وضوح فيها لف ودوران و قلق و حاجه كده مستتره وحتى اللى فيها مش خايف, تعاملات كأن فى حاجه مش مريحه فى التعامل مخلوط على بجاحه ,  ده غير بالعربى كده  حاجه تانيه عجيبه اوى ان كله بيرسم على بعضه كله  بيكدب على بعضه.. عالم كله زيف مستتر
هل ده طبيعى ولا ده ناتج من وقائع ماعنديش درايه او خبره بيها ولا هى مصالح ولا قلق من المواجهه ولا دى الحياه وتطورها الطبيعى فى نظرى المنحدر !!
كوكبى وتعريف الحياه فيه: هو حياه طبيعيه مافيهاش زيف مافيهاش اقنعه مافيهاش لف ولا دوران  مافيهاش وحاشه الكويكب ده,  ماحدش بيقول ان كوكبى يوتوبيا او انى ملاك ولكن وحش اوى الكويكب ده ,, الكويكب ده صعب وصعب الحياه فيه وصعب اوى البنى ادم يعرف يعيش  من غير مايحصل و يتفاعل فيه حايبقى التيجه بتاعته انه يا حايتقوقع او حايبقى وحش زيهم يا حاياخد على دماغه ويجراله حاجه ويا يتعامل ويجراله حاجه برضه لانه بيتعامل بره طبيعته ومش راضى عن فعله..
مش مسأله ضعف ولا قوه ولا حاتبقى محسوبه كده, حاتبقى مش عارف تجارى الكويكب ده.. وده يتقاس على معاملات شغل وعيشه وحب وتعامل وتفاعلات الحياه اليوميه, من الاخر كده الايام دى الدنيا بقت صعبه جدا حدا جدا…
الناس بقت بتشوف ان الاكل والشرب ولقمه العيش صعب..  لأ انا  شايفه المعاملات بقت صعب الهوا بقى صعب , الهوا بقى جواه حاجات ملوثه كتيره اوى, مش هوا  كارياح مع انه كمان بقى ملوث,  ولكن اقصد هوا البنى ادمين اللى بتتنفسه فى تعاملهم,  هوا البنى ادمين اللى ييقولوه او يضمروه لبعضهم, هوا البنى ادمين اللى قلوبهم مابقتش صافيه ولا نقيه وجواها شئ من غيره وحقد وخبث وتخطيط للوصل ونفاق وخداع … وكل حاجه كأنها لعبه ملوثه وحوارات ونفوس مش طيبه مع ان الدنيا ماهياش لعبه اصلا, اتقلبت للعبه اتقلبت لحاجات وحشه كتير معناها صعب.. على فكره ده مش سذاجه ولا قله معرفه ولا قله خبره .. هيه يمكن انا من كوكب تانى :  كوكبى ماكنش فيه الحاجات دى, كان هواه طبيعى  وفيه حاجات كتيره طبعا من الحياه الطبيعيه فيه حب فيه طموح  وفيه ان حد مش بيحب حد وان واحد عاوز يكسب وان واحد عاوز ينجح  بس مش بالطريقه دى, ومش بالبشاعه دى, مش بالقسوه دى, مش بعدم الامانه دى, مش بالاستهتار وقله قيمه البنى ادمين كده.. كويكب الحياه اللى بشوفه ده صعب اوى وصعب ان الجيل اللى طالع ده انه يكون كده  وحايبقى اكتر من كده لانه هو طالع متشبع  باللى هوه شايفه فافكره ان ده العادى  والاصول والصح والغلط وغيره من اللى شبوا عليه الاجيال اللى قبل كده واللى شافوه وعاشوه بيتبخر .. واللى معافر ونجى من الكويكب ده تعبان  ومضطر يعيش وتذكرته للكوكب الاخر صلاحيتها تقريبا انتهت لانه لا عارف يعيش فى الكويكب ده ولا يرجع كوكبه  فبتالى  حاله صعب!!
وناس كتيره اوى بيقولوا كلام كده ولكن هما مش بجد بيقصدوه ولانهم شايفينه حاجه حلوه  فبيستعملوا كلامها ولكن مابيتطبقهوش ولابتعاملوا بيه, والكلام مافيش اكتر منه الحقيقه, ولكن الاحسن والاوقع التصرف والموقف واثباته بالفعل والتلقائيه … خساره ان كوكبى بيبعد وبيحصله انفصال من الكويكب ده..
و فابالتالى كويكب الحياه الموجود ده علاقاته معظمها بقت مستتره زائفه سواء من معامله  سواء من قوه سواء من مال سواء من آداميه واكيد سواء من حب…. كله بقى لاخبطيته
الحياه فيها حسره جامده جدا ولما تتكلم مع حد من نفس كوكبك بتلاقى انه هو  بيقولك حانعمل ايه!  هو حقيقى حاتعمل ايه؟  ولكن هو البنى ادم لازم يحاول انه يقول للى ميعرفش فى الكويكب ده ويحاول يشرح له,  صحيح فى ناس حاتستجيب وفى ناس لأ,  فى ناس حاتتفاعل وفى ناس لأ,   وفى ناس حاتحاول تكسرك وناس لأ,  فى ناس تانيه حايصعب عليها حالك ويقولوا عليك انت قديم,  انما مع الزمن الناس حاتفهم وفى ناس لوحدها بتقدر الكلام ده وبتحاول واعتقد ان المحاوله لتعديل كويكب الحياه للايجابيه شئ لابد منه وجايز بعد عشرين سنه ادام وإن ماكانش اكتر..
وانا مسميه الحياه كويكب لانها بقت داخله مخنوقه كانها فى غلاف, مع ان الحياه دى مفتوحه حره, ولكنها  بقت مقننه زى الارض فى وسط منظومه الفلك ماشيه بسمتريه,  وفى نفس الوقت من ضمن التناقض كويكبنا هنا مابقاش ماشى بسمتريه بقى مصير والبنى ادمين هما اللى عملوا فيه كده وانا حزينه على حالنا وحريه كوكبى وهواه ..
مصريه
2017

اضف رد

لن يتم نشر البريد الإلكتروني . الحقول المطلوبة مشار لها بـ *

*