اليوم الخميس 14 ديسمبر 2017 - 8:24 صباحًا

  
  رئيس التحرير
  شكري رشدي



من خواطرى: عاميتى ناقص فلفلها حبه .. بقلم: منى حسن

mona-haasan

اللغه العربيه فى مدارسنا هى دايما حمل تقيل ومن اصعب مواد السنين,  ومضمون اللغه العربيه طول عمره فى مدارسنا مشكله.

اولا للصعوبه واكراه التلميذ بالحفظ واخيرا النحو..

قلائل الى حبوه اللغه العربيه, الى جانب ان لغتنا,  عاميه بسيطه وهى المتعامل بيها وبنفكر بيها,  وهى مفهومه ومهضومه فى كل البلاد المجاوره,  وهى كمان كانت وسيله مؤثره على الشعوب العربيه الاخرى سواء بالاذاعه او التليفزيون او السينما. وللاسف احنا بنغيرها!! واكيد ماحناش بنفكر بالنحوى فى دماغنا.

اللغه العاميه هى بصمه الشعب المصرى وهويته,  واللغه العاميه سهله لشعبها واحيانا يٌطعم بها كلام الشعوب الاخرى.

كتابه اللغه موضوع تانى: لان فى واقع الحياه ان كُتّابنا كتابتهم بدءت باللغه الفصحى زى ماكانوا بيقروا الكتب المتداوله من الشرق واكيد لغه القران ايضا باللغة العربية الفصحى وهي اللغة التي كُتّبت بها معظم النصوص العربية فى بلادها،  وتقابلها العامية والدارجة المحكية بلهجات محلية,

وكثيرين درسوه فى الكُتَاب زمان,  وكُتّابنا عبروا بيه, وده غيير طريقه كلامهم واصبح هو ده السائد.

علما المفروض كلامى هى كتاباتى. لغتى هى من اكون..

حتى لغات فى العالم وفى بلاد كتيره اوى, فى البلد الواحده عندها كذا طريقه للكلام “لهحه””سلانج”  ولكل طريقه ليها كتابتها التى تميز الكُتّاب بانهم من هذه المنطقه سواء جنوبيه,  شماليه, غربيه اواى ان كان منطقتهم او مقاطعتهم وهومقبول جدا ولذلك لتفتح العقول وتقبل واحترام اسلوبهم, ولان تجمعهم حدود واحده وهى بلدهم.

الإلزام:  هو تقيد والتقيد اول عدو للإبداع  والزام الفرد بالقواعد هو قيد, وحاول الشيخ امين الخولى فى التلاتينات تخفيف النحو فى كتاب تيسيرالنحو, وايضا تبسيط النحو لشوقى ضيف فى التسعينات,  اللغه العربيه لغه صعبه جدا و بها استثناءات اكتر من القواعد ومحتاجه عمر على عمر للتبحر,

ولو بدءنا باللغه واصل مفهومها:  هو التواصل وفهم الاخر وتوصيل اشاره توضيح و فكر للتعامل مع الاخر, وقد بدء بلاتو بالتفكير فيها وغيره  بفلسفه اللغه فى اليونان القديمه,

واللغه تتطور مع الوقت وتتحور فى استخدامتها فى النواحى الاجتماعيه والثقافيه والعلميه

وكتابه اللغه ووضع قوانيين لها كالنحو هو لتفعيل النطق وتشكيل ازمنته ولو تجرد منه حايبقى مفهوم برضه.. والموضوع حايتفهم خصوصا بعاميتنا , بساطه الكلام فيه سهوله لمعناه.

النحو عامل زى الملح والفلفل للكلام ولكن اصل الكلام واحد وخصوصا فى لغتنا العاميه

واللغه العاميه زى اى لغه لها كلماتها التى تتميز بيها و ايماءتها المكتسبه مع الوقت

اما الكتابه بها فقلائل كتبوا بها ومش مفهوم ليا ليه مش الاغلبيه؟  وان تكون دى لغه كُتّابنا, ماهو القارئ مصرى ودى لغته.

عند بدايه كتاباتى بلغتى قوبلت برفض شديد وعدم استيعاب للمبدء ونصايح لدرجه ان مضمون الموضوع اتنسى من الهجوم,  ومع إصرارى ان تُقرا كتاباتى،  بدءت المواضيع تناقش مع الاشاره ايضا على عاميه الكتابه ولكنى اصريت على هويتى ولغتى العاميه لانى احبها,  ونزلت كتاب فى السوق ولاقى اقبال ونوقش فى ندوه والحقيقه انها كانت ايجابيه لدرجه انى تمنيت اننا نكون ابسط من ان نحارب او ننتقد لمجرد التعود او ان هو ده الدارج او ازاى اكسر القاعده او الخوف بالاقرار ان ممكن تٌقبل مدرسه جديده او اسلوب جديد او فكر اللى هوه الطبيعى اللى هو من واقع كلامنا.

العاميه لغه سهله جميله وهى لغه شعب مصر… انت بتكلم مصرى وهى مصريتنا

هجوم مباشر او غير مباشر فى عالمى وتحليلاتى هو رد فعل طبيعى لفكر عقيم مقيد, غير مبالى غير بدراساته الاكاديميه وحاطت و محوط نفسه فى هاله وبراويز صعب عليه تلقى جديد او انه يكون صانع و مبدع, وفى العادى مواضيعه من مجتمعه باحصاءتها وما يقراه وليست تطوير واضافات من افكاره الشخصيه. ده مش العموم ولكن السائد

فكر ونقد فنانه تشكيليه فى كتابتها هى مواضيع بنائه مجرده ، خطوط ونقط وتعاملات تراها وتعبر عن ما يحدث حولها ببساطه لغتها بدون تعقيد زائد وهرفطته كلام معقد ال يعنى زى انه الكاتب متبحر وخصوصا مش موضوع متخصص ولا محتاج جعلصه كلام.

الانتقاد بالنسبه لى نجاح, واعرف انى فى طريق ايجابى وان موضوعى مقروء ويعَلق عليه وله مردود و مفهوم,  الطريف هو عدم استعياب الناقد وعدد من الكتاب بان يقر ان طريقه كتاباتى بالعاميه هو ده اسلوبى ومش حاغيره وان مضمون موضعاتى اهم بكتير اوى من انهم يمسكوا كيفيه كتابتها, وان فلفلها عياره مش ظابط.

وفى نفس الوقت يطالبوا ويهمهم ارائى والافكار التى اتناولها ومناقشتها وبحث الحلول, وعموما من وجهه نظرى ده لا يفسد للود قضيه لانه بناء..

من المقولات اللى قالها روسو ان العواطف جت منها اللغه وارى ان هم مجموعه من التفاعلات اكيد العاطفه لها دور مع الحاجه ومع الفكر ومع الانفعال وردود الافعال وغيرها من التفاعلات الانسانيه المؤثره فى حياه الانسان.

وكده تكون وصلت فكرى لمن يهمه كتاباتى و لنقادى وياريت ينفتح ابواب افكارهم ببعد نظرهم  وينظروا للمضمون وليس الاسلوب , ويتقبلوه مشكورين

خصوصا ان نوع جديد من اللغات تتداخل وهى للغه دلوقتى بقت الاصطياد والمصلحه وهى لغه مفهومه جدا دارجه ودى مش محتاجه تدقيق لغوى وخصوصا ان لغتنا العاميه الجميله بدات تطغى عليها عشوائيه اللغه, والميديا اللى استعملتها وقدمتها لابنائنا فى الافلام والمسلسلات وال٦ سنين اللى فاتوا كسروا حاجز الاحترام وتوغلت القوه العشوائيه فى الشارع. وحاجات كتييييير تانيه فى القايمه, اللغه اخر همها… وللاسف حاتبوظ وتحور اللغه العاميه

ولو رجعت المدرسه تانى اللغه العربيه حاتكون مشكله لان مافيش تطور لا فى المناهج ولا فى طريقه تدرسيها…

وبرضه ماتفرئش لان اكيد العاميه حاتكون هى لغتى لبساطتها و نغمتها ولحبى الشديد لمصريتى…

مصريه

٢٠١٦

اضف رد

لن يتم نشر البريد الإلكتروني . الحقول المطلوبة مشار لها بـ *

*